Pakistan ilk dəfə “Şahpar-II” zərbə PUA-larını təqdim etdi

Təqdimat Misirdə keçirilən EDEX-2021 müdafiə sərgisində baş tutub.

PUA-lar “Nescom” tərəfindən hazırlanmış və 8 kilometr atış məsafəsinə malik yarımaktiv lazerlə idarə olunan döyüş sursatından istifadə edir. “Şahpar-II” qeyd olunan döyüş sursatından 2-sini eyni anda daşıya bilir.

PUA hücum missiyaları üçün 7 saat, müşahidə missiyaları üçün isə 14 saat havada qalmaq qabiliyyətinə malikdir. 300 km məsafədə real vaxt rejimində məlumat bağlantısı olan “Şahpar-II” 1050 km məsafəyə qədər SATCOM (peyk rabitəsi) ilə idarə oluna bilir. “Şahpar-II” PUA-ları avtomatik qalxma və enmə qabiliyyətinə malikdir.

PUA-nın hazırlanmasında daha yüngül və daha çevik manevr etmək üçün kompozit materialdan istifadə edilib.

Pakistanın “Şahpar-II” ilə Afrika, Cənubi Amerika və Yaxın Şərq bazarlarına çıxmağa çalışacağı təxmin edilir. Bununla belə, PUA-nın ilk müştərisi Pakistan Ordusu olacaq. Pakistanın yerli və ucuz qiymətə istehsal etdiyi “Şahpar-II” PUA-larından Hindistan sərhədində kəşfiyyat və müşahidə missiyaları üçün istifadə etməyi planlaşdırdığı bildirilir.