Rusiya 2022-ci ildə “Uran-9” robotlarının kütləvi sınaqlarını keçirəcək

Bu barədə Rusiya Silahlı Qüvvələrinin generalı Oleq Salyukov “Krasnaya Zvezda” (Qırmızı Ulduz) nəşrinə verdiyi müsahibə zamanı məlumat verib.

General Salyukov həm “Uran-9” zərbə, həm də “Nerexta” kəşfiyyat robotlarının 2022-ci il ərzində Rusiya Quru Qoşunları tərəfindən xidmətə qəbul ediləcəyini və bu sistemlərdən istifadə edərək “eksperimental hərbi xidmətin” aparılacağını bildirib.

Bu sınaqların nəticələri Rusiya Quru Qoşunlarının ehtiyaclarını ödəmək üçün alınacaq robotların optimal sayı ilə bağlı qərara təsir edəcək.

“Uran-9”un əsas vəzifəsi distans kəşfiyyat aparmaq və döyüş zamanı hərbi bölmələrə dəstəkdir. Robot xüsusi mobil idarəetmə məntəqəsindən idarə olunur. Qeyd edək ki, hazırda üzərində işlər aparılan universal platforma əsasında “Armata” da daxil olmaqla, təxminən 30 müxtəlif təyinatlı maşın yaratmaq mümkün olacaq. “Uran-9” zərbə robotunun döyüş-təcrübə istifadəsi onun çatışmazlıqları və üstünlüklərini göstərəcək, həmçinin robotun orduya uyğunlaşdırılması üçün zəruri tədbirlərin müəyyənləşdirilməsinə kömək göstərəcək.

“Uran-9” döyüş robotu Rusiyanın T-14 “Armata” əsas döyüş tankının şassisi üzərində yaradılıb. Robot Suriyadakı döyüş tətbiqi təcrübəsi nəzərə alınaraq modernləşdirilib.

Xatırladaq ki, “Uran-9” Rusiya ordusu tərəfindən 2019-cu ilin yanvar ayında qəbul edilib. Kompleks birgə döyüş, kəşfiyyat və antiterror missiyalarını yerinə yetirmək üçün nəzərdə tutulub. Sistem 30 mm-lik 2A72 topu, dörd tank əleyhinə idarə olunan raket və 12 “Şmel-M” raketləri ilə silahlana bilər.