Hindistan Ladaxda istifadə üçün İsraildən 4 ədəd “Heron MK II” PUA-ları alır - Çinin cavabı necə olacaq?

 Hindistan Ladaxda istifadə üçün İsraildən 4 ədəd “Heron MK II” PUA-ları alır -  Çinin cavabı necə olacaq?
304     11:32     30 09 2021    
Hindistan və Çin arasında Ladax mövzusunda gərginlik fonunda Yeni Dehli İsrailin “Israel Aerospace Industries” (IAI) şirkətindən dörd ədəd “Heron MK II” adlı müşahidə üçün nəzərdə tutulan Pilotsuz Uçuş Aparatı (PUA) alıb.

Hindistan PUA-ları Ladaxda Çin ordusunu müşahidə etmək üçün istifadə edəcək.

Hindistanın “The Times of India” nəşrinin məlumatına görə, PUA-ların alınması barədə müqavilə yanvar ayının ortalarında imzalanıb, lakin COVID-19 pandemiyasına görə tədarükündə gecikmələr yaşanıb.

PUA-ların ilin sonunadək Hindistana təhvil verilməsi gözlənilir. Təxminən 200 milyon dollar dəyərində olan müqavilənin əvvəlcə üç illik kirayə müqaviləsi olacağı gözlənilirdi, lakin Yeni Dehli Çinlə davam edən sərhəd münaqişəsi fonunda ölkənin ordusunu təkmilləşdirmək planlarının bir hissəsi olaraq platformaları satın almağa qərar verib.

Məlumata görə, Hindistan PUA-ları lazerlə idarə olunan bombalar, “hava-yer”, tank əleyhinə idarəolunan raketlərlə təchiz etməyi planlaşdırır.

Hindistan Hərbi Hava Qüvvələri artıq müşahidə və kəşfiyyat toplama üçün 108 ədəd IAI tərəfindən hazırlanan “Searcher” və 68 silahsız “Heron 1”, yüksək partlayıcı döyüş başlığı daşıyan IAI istehsalı “Harpy” PUA-larına sahibdir.

IAI tərəfindən ən müasir texnologiyalardan istifadə edilərək hazırlanan “Heron MK II” müxtəlif yüklər daşıya bilən strateji və çoxyönlü PUA-dır. “Rotax 915 iS” mühərriki ilə təchiz olunmuş PUA 10.000 metrdən çox yüksəkliyə, maksimum 140 düyn sürətinə çata və 45 saat havada qala bilir.

“Heron MK II” İsrail Hərbi Hava Qüvvələri tərəfindən istifadə edilən və dünyanın 20-dən ölkəsinə, eləcə də Azərbaycana satılan “Heron” PUA-larının yenilənmiş modelidir. Daha böyük və təkmilləşdirilmiş sensorlar ilə “Heron MK II”nin gözəçarpan xüsusiyyəti düşmən atəşindən on kilometrlərlə uzaqdan və sərhədləri keçmədən kəşfiyyat toplamaq qabiliyyətidir. PUA-nın maksimum uçuş çəkisi 1350 kq, daşıdığı faydalı yükü 470 kq-dır.

Təkmilləşdirilmiş istehsal texnologiyaları sayəsində “Heron MK II” sualtı hədəfləri müəyyən etmək üçün “Sonobuoy” sualtı əleyhinə izləmə sistemləri və maqnitometrini daşımaq üçün kifayət qədər güclü, daha geniş quruluşa malikdir. PUA kəşfiyyat məlumatlarının eyni vaxtda paylaşılmasına imkan verən genişzolaqlı rabitə sistemlərinə əlavə olaraq, təkmilləşdirilmiş mühərrik və avionikaya malikdir.

IAI şirkəti İsrail PUA-larının aparıcı ixracatçısı hesab olunur və dünyanın 50-dən ölkəsinə PUA ixrac edib.
Strategyvision.org
Oxşar məqalələr
Son əlavə olunanlar