“Reaper” PUA-ları artıq tam avtomatik qalxa və enə bilir

Holloman aviabazasında həyata keçirilən sınaqlar zamanı PUA yeni quraşdırılmış avtomatik havaya qalxma və yerə enmə qurğularından istifadə edib.

Bundan əvvəl peyk rabitəsi ilə PUA-nın havaya qaldırılması və təcili vəziyyət olduğu təqdirdə ehtiyat rabitə sisteminin işə salınması kimi yeni funksiyaları sınaqdan keçirilib.

ABŞ peyk rabitəsi vasitəsilə çox uzaq məsafələrdə yerləşən PUA-ları idarə edə bilir. Ancaq PUA-ların havaya qaldırılması üçün ərazidə əlavə heyətə ehtiyac var. Yeni funksiya ilə PUA-nın yaxınlığında olan heyətin sayı tamamilə azaldılacaq. ABŞ öz ərazisindən Asiyada yerləşən PUA-larını havaya qaldıra, endirə və idarə edə biləcək.

Son on ildə MQ-9-lardan ABŞ Mərkəzi Komandanlığının əməliyyat bölgəsindəki sabit bazalarından əməliyyatlar aparmaq üçün istifadə edilib. Bu PUA-lar “General Atomics Aeronautical Systems” tərəfindən ABŞ Hərbi Hava Qüvvələri, ABŞ Hərbi Dəniz Qüvvələri və Britaniya Hərbi Hava Qüvvələri üçün yaradılıb. MQ-9 “Reaper” PUA-nın mühərriki saatda 250 knot sürət yığmasını və 40.000 fit hündürlüyə çıxmasını təmin edir. MQ-9 1.5 ton ağırlığında olan sursat daşımaq qabiliyyətinə malikdir. (“Hellfire” döyüş raketi və GBU-12 Lazer Başlıqlı Bombalar).