İsrail PUA-ları zərərsizləşdirəcək yeni lazer silahı hazırlayıb - VİDEO

Bu barədə İsrailin Müdafiə Nazirliyi məlumat yayıb.

Bildirilir ki, hələlik adı açıqlanmayan lazer silah İsrailin qısa mənzilli raketlərlə mübarizə üçün nəzərdə tutulan “Dəmir Günbəz” və ballistik raketlərə qarşı mübarizədə istifadə edilən “Davidin Sapandı” və “Arrow” Hava Hücumundan Müdafiə (HHM) sistemlərini əhatə edən çoxtəbəqli HHM arxitekturasına daxil ediləcək.

İsrail rəsmisi bildirib ki, lazer sistemi yüngül təyyarələrə quraşdırılıb. İlkin sınaqlarda 1 kilometr məsafədə bir neçə PUA-ya qarşı uğurlu olub.

“Elbit Systems” şirkəti bundan başqa raketləri sıradan çıxarmaq üçün lazerdən istifadə edən təyyarələrə quraşdırılmış “C-Music” müdafiə sistemi hazırlayır. Şirkət rəsmiləri yeni lazer silahının “C-Music”ə bənzər izləmə texnologiyalarından istifadə edəcəyini, ancaq hədəfləri yandıraraq məhv edəcəyini qeyd edir.

İsrailin Müdafiə Nazirliyinin araşdırma və inkişaf bölməsinin generalı Yaniv Rotem 20 km məsafədə 100 kilovatlıq gücə malik prototipin 3-4 il ərzində istismara veriləcəyini bildirib.

İsrail Müdafiə Nazirliyi, “Elbit Systems” və dövlətə məxsus “Rafael Advanced Defence Systems” şirkətləri hava təhdidlərini vurmaq üçün quruda yerləşdirilmiş lazer silahı üzərində də işləyir. Nazirliyin bildirdiyinə görə, bu 8-10 km məsafədə hədəfləri vura viləcək. Sistemin 2025-ci ilə qədər istismara veriləcəyi qeyd olunur.