Avropadan “Eurodrone” proqramı: Artıq lazımi büdcələr təsdiqlənib

“İnfodefensa” nəşri yazıb ki, “Eurodrone” OCCAR (Birgə Silahlar üzrə Əməkdaşlıq Təşkilatı) vasitəsilə Avropa sənayesi ilə müqavilə bağlanmış Uzaqdan İdarə olunan Hava Sisteminin (RPAS) dizaynı, inkişafı və istehsalı üçün Almaniya, Fransa, İtaliya və İspaniyanın iştirak etdiyi çoxmillətli proqramdır.

“Airbus” şirkətinin məlumatına görə, “Eurodrone”modul dizaynı sayəsində minimal məhdudiyyətlər və asan daşınma əsasında mülki hava məkanına həqiqi inteqrasiyaya hazır olan istənilən gələcək döyüş hava sisteminin əsas sütunlarından biri olmaq üçün nəzərdə tutulub.

İstehal ediləcək PUA kəşfiyyat, müşahidə, hədəf alma və kəşf (ISTAR) əməliyyatları üçün çoxfunksiyalı imkanlar və potensial təklif edəcək. Tələblər və xüsusiyyətlər son istifadəçilər (Almaniya, İspaniya, Fransa və İtaliya), satınalma təşkilatı (OCCAR) və iştirakçı şirkətlər (“Dassault Aviation”, “Leonardo” və “Airbus Spain”) arasında müzakirə edilib və uyğunlaşdırılıb.

Proqram çərçivəsində İspaniya üçün 6 sistemin istehsalı planlaşdırılır. İspaniyanın proqramda iştirakının 23% olduğu bildirilir.

İspaniya proqram çərçivəsində təxminən 1,9 milyard avro büdcəni təsdiqləyib. Dörd sistem üçün büdcə (hər sistem üç PUA və iki yerüstü idarəetmə stansiyasından ibarətdir) 1,7 milyard avrodur.

“Eurodrone” proqramının digər iştirakçı ölkələri artıq lazımi büdcələri təsdiqləyib və layihəyə yaşıl işıq yandırıb. Artıq proqramın başlaması üçün heç bir maneə yoxdur.

Proqram çərçivəsində istehsalçı ölkələr üçün 2034-cü ilə qədər 20 partiya (60 ədəd) “Eurodrone” istehsalı hədəflənir. Proqram çərçivəsində istehsal ediləcək PUA-nın ilk uçuşu 2025-ci ildə həyata keçiriləcək. İlk kütləvi istehsal PUA-ların 2028-ci ildə başlaması gözlənilir.

MALE (orta əməliyyat hündürlüyü, uzun uçuş müddəti) sinifində olacaq “Eurodrone” 2 turbovintli mühərrikə sahib olacaq. PUA-nın qanadlarının uzunluğu 26 metr, gövdə uzunluğu isə 16 metr olacaq. Maksimal uçuş çəkisi (MTOW) 11 tondur. Faydalı yük daşıma qabiliyyəti 2,3 tona qədər ola bilər. PUA-nın 24 saat havada qala biləcəyi qeyd olunur.