Dünyada yeganə hipersəs sürətə malik PUA Çin tərəfindən hazırlanıb

ABŞ-da yerləşən “Military Watch” nəşri yazıb ki, söhbət WZ-8 PUA-larından gedir. Çin 2019-cu ildə dövlətin yaranmasının 70 illiyi şərəfinə keçirilən hərbi parad zamanı hipersəs sürətə malik PUA-nın yaradılmasını elan edib.

Çin son vaxtlar texnologiyanın inkişafında lider mövqe tutur və Çin Xalq Azadlıq Ordusu (PLA) üçün yeni silahlar yaradır. Bunlardan biri hipersəs sürətə çatmağa qadir olan yeni WZ-8 kəşfiyyat PUA-sıdır. Onun xüsusiyyətləri naməlum olaraq qalır, lakin mövcud məlumatlara əsasən, WZ-8 7-8 Max vahidi sürətə malikdir ki, bu da ABŞ və Qərb ölkələrinin istifadə etdiyi, PUA-ları zərərsizləşdirmək üçün nəzərdə tutulan “hava-hava” raketlərindən xeyli yüksəkdir.

Çinli mütəxəssislərin hipersəs hava vasitələri yaradılması sahəsindəki üstünlüyü onlara gələcəkdə daha sürətli PUA və idarə olunan döyüş təyyarələrinin yaradılmasına kömək edəcək müəyyən texnoloji baza yaratmağa imkan verir.

WZ-8 kəşfiyyat məqsədilə istifadə edilən PUA-dır. Yüksək əməliyyat hündürlüyünə və yüksək sürətə malik PUA düşmənin ağır müdafiəsi altında olan hədəflərin yüksək keyfiyyətli şəkillərini toplaya və döyüş hissələrinin qiymətləndirilməsi üçün bütün birliklərə dəyərli kəşfiyyat məlumatları verə bilər.