İraq “Bayraktar TB2” PUA-ları üçün 100 milyon dollar vəsait ayırdı

Londonda yerləşən “Əl Ərəbi əl-Cedid” (Yeni Ərəb) xəbər saytı İraqın yüksək hərbi mənbələrinə istinadən yazıb ki, İraqın silahlanma büdcəsi çərçivəsində ayrılan TB2 payı müqavilə imzalanacağı təqdirdə aktivləşdiriləcək. Mənbələrin bildirdiyinə görə, İraq “Bayraktar TB2”lərdən, xüsusən də İraq-Suriya sərhədinin monitorinqində fəal şəkildə istifadə etmək niyyətindədir.

Bu çərçivədə İraqın müdafiə rəsmilərindən ibarət nümayəndə heyətinin yaxın vaxtlarda yenidən Türkiyəyə səfəri gözlənilir. Müqavilə imzalanacağı təqdirdə İraq ordusunun hərbi qulluqçuları “Bayraktar TB2” təlimi üçün Türkiyəyə gələcək.

“Breaking Defence” nəşrinə danışan türk müdafiə sənayesində çalışan, adı açıqlanmayan rəsmi Türkiyə ilə İraq arasında “Bayraktar TB2” ilə bağlı danışıqların bir ildən artıqdır davam etdiyini bildirib. Mənbə İraqın ən azı 12 “Bayraktar” almaq istədiyini qeyd edib.

İraq Müdafiə naziri Cuma İnad Sadun isə ötən aylarda verdiyi açıqlamada Türkiyədən “Bayraktar TB2” PUA-ları, “Atak” helikopterləri və radioelektron mübarizə vasitələri alınması üçün razılığa gəldiklərini açıqlayıb.

Müdafiə naziri Sadun IDEF-21 çərçivəsində Türkiyənin bir çox müdafiə sənayesi şirkətinin yüksək səviyyəli rəsmiləri ilə görüşlər keçirib.