BƏƏ və İsraildən “170 M” şərti adlı insansız dəniz platformaları

BƏƏ və İsraildən “170 M” şərti adlı insansız dəniz platformaları
279     11:59     19 11 2021    
Birləşmiş Ərəb Əmirlikləri və İsrailin dövlətə məxsus silah istehsalçıları Dubayda sualtı qayıqlara qarşı müharibə apara bilən insansız dəniz platformalarının birgə istehsalına dair strateji saziş imzalayıblar.

Birləşmiş Ərəb Əmirliklərinin “Edge” və İsrailin “Israel Aerospace Industries” (IAI) şirkətləri iki ildən bir keçirilən Dubay aviaşousunun son günündə tərəfdaşlıq elan ediblər.

Birgə bəyanatda şirkətlər həm hərbi, həm də ticari məqsədlər üçün istifadə oluna biləcək “170 M” şərti adlı inkişaf etmiş modul tipli insansız dəniz platformaları dizayn edəcəklərini bildiriblər.

Razılaşma BƏƏ və İsrailin keçən il ABŞ vasitəsilə münasibətlərini normallaşdırmasından sonra əldə edilib. Normallaşma qərarından sonra ABŞ BƏƏ-yə F-35 döyüş təyyarələrinin satışına razılıq verib.

Aerokosmik və müdafiə şirkəti olan IAI mart ayında “Edge” ilə birlikdə inkişaf etmiş bir antidron sistemi hazırlayacağını açıqlayıb.

BƏƏ-İsrail istehsalı insansız dəniz platformaları yarı və tam avtonom şəkildə fəaliyyət göstərə və sualtı qayıqların aşkarlanması, habelə sualtı qayıqlara qarşı döyüş də daxil olmaqla missiyaları yerinə yetirə biləcəklər. Platforma, həmçinin kəşfiyyat, müşahidə, nəzarət, minaların aşkarlanması və zərərsizləşdrilməsi üçün də istifadə edilə bilər.

“Abu Dhabi Ship Building” (ADSB) platformanı layihələndirəcək, idarəetmə sistemlərini və faydalı yükü birləşdirəcək, IAI isə avtonom idarəetmə sistemini inkişaf etdirəcək və ona faydalı yükləri inteqrasiya edəcək. Bəyanatda layihəyə nə qədər sərmayə qoyulduğu və nə vaxt istehsala başlayacağı barədə məlumat verilmir.
Strategyvision.org

Teq: BƏƏ   İsrail   IAI   170-M   Edge  


Oxşar məqalələr
Son əlavə olunanlar