Avstraliya avtonom hərbi yük maşınlarının hazırlanmasına 3,5 milyon dollar ayırıb

Layihə üçün ilkin olaraq 3.5 milyon dollar ayrılıb. Bu çərçivədə hazırlanan maşınlar bir sıra yol sınaqlarını uğurla başa vuraraq mühüm mərhələni keçib.

Modifikasiya edilmiş “Land 121 40M” yük maşınlarından istifadə edən avtonom avtomobil texnologiyası Deakin Universitetində İntellektual Sistemlərin Tədqiqat və İnnovasiya İnstitutu (IISRI) ilə Ordunun Robotik və Avtonom Sistemlərin Tətbiq və Koordinasiya Ofisi (RICO) arasında müqavilə əsasında hazırlanıb.

Sınaqlar Viktoriya ştatının Moneqeetta şəhərində yerləşən “Defence's Trials and Proving” müəssisəsində iki həftə ərzində baş tutub və karvanda beş avtomobil iştirak edib.

Avstraliyanın Müdafiə Sənayesi naziri Melissa Prays robot və avtonom sistemlərin inkişafının Avstraliyanın gələcək əməliyyat problemləri, o cümlədən humanitar yardım və fəlakətlərin nəticələrinin aradan qaldırılması və döyüş əməliyyatlarında həlli üçün çox vacib olduğunu söyləyib.