Daha bir Afrika ölkəsi Türkiyədən zərbə PUA-ları alacaq

Görüşdən sonra keçirilən birgə mətbuat konfransında Ərdoğan terrorla mübarizədə Anqolanın yanında olmağa davam edəcəyini vurğulayıb.

Ərdoğan Anqolanın Türkiyədən zərbə tipli Pilotsuz Uçuş Aparatları (PUA) və zirehli maşınlar almaq istədiyini bildirib.

Türkiyənin Anqola ilə müdafiə sənayesi əməkdaşlığında problem olmadığını qeyd edən Ərdoğan ölkəsinin Anqolaya hər cür dəstək verməyə hazır olduğunu ifadə edib.

Türkiyənin təxminən 1 milyard 300 milyon əhalisi olan Afrika qitəsinin 43 ölkəsində səfirlikləri var (2009-cu ildə cəmi 12 idi). 2020-ci ildən etibarən Türkiyənin Afrika ilə ticarət həcmi 25 milyard dolları keçib, Afrikaya yatırımı isə 7 milyard dollara yüksəlib.

Bir müddət əvvəl “Reuters” agentliyi məlumat yaymışdı ki, Türkiyə bir neçə döyüş bölgəsində uğurla istifadə edildikdən sonra Mərakeş və Efiopiya ilə satış müqavilələri imzalayaraq zərbə tipli PUA ixracatını genişləndirib.

Türkiyə rəsmi olaraq Efiopiya və Mərakeşlə hər hansı müqavilə barədə məlumat yaymayıb, lakin razılaşma ilə tanış olan bir neçə mənbələr “Reuters” agentliyinə detalları ötürüb. Mənbələr Efiopiya və Mərakeşlə imzalanan müqavilələrin “Bayraktar TB2” PUA-ları, ehtiyat hissələr və təlim kurslarını əhatə etdiyini bildiriblər.

Bir sutkadan artıq müddətdə havada qala bilən “Bayraktar TB2” zərbə PUA-ları Türkiyənin Suriyada Bəşər Əsədə sadiq ordunun şimal bölgələrinə hücumunun, Liviyada Rusiya, Birləşmiş Ərəb Əmirlikləri və Misir tərəfindən dəstəklənən qiyamçı feldmarşal Xəlifə Həftərin Tripoliyə hücumunun qarşısının alınmasında böyük rol oynayıb. PUA-lar, həmçinin Qarabağ müharibəsinin ikinci mərhələsində Azərbaycan tərəfindən istifadə edilib və Ermənistan ordusunun məhv edilməsində böyük rol oynayıb.