“Bayraktar TB2” PUA-larına sürətli xəritəçəkmə bölməsi inteqrasiya edilib

“Rapid Mapping Pod” adlanan xüsusi qurğu ilə PUA 24 saat ərzində minlərlə kvadrat kilometr ərazinin yüksək keyfiyyətdə (7 sm və daha az) xəritəsini hazırlaya bilər.

PUA-larda faydalı yük kimi istifadə edilən bölmə dəqiq coğrafi koordinatlara malik xəritələri avtomatik hazırlayır.

“Baykar” şirkətinin rəhbəri Haluk Bayraktarın 2018-ci ildə verdiyi açıqlamalara görə, sistem şirkətin özü tərəfindən hazırlanıb və daha sonra “Bayraktar TB2”yə inteqrasiya edilib.

Haluk Bayraktar xəritəçəkmə funksiyası ilə bağlı çıxışında belə demişdi: “Bunu belə ifadə edə bilərik, məsələn Afrinin ərazisi 2000 kvadrat kilometr idi. İnkişaf etdirdiyimiz qurğu “Google Earth”dən 2-2,5 qat daha yaxşı şəkil və xəritəçəkmə qabiliyyətinə malikdir”.

Sistem Türkiyə Milli Müdafiə Nazirliyinə bağlı olan Xəritələr Baş İdarəsi adlı milli kartoqrafiya qurumunun imkanlarının artırılmasına böyük töhfə verəcək. Təxminən 750 personalı olan qurum müdafiə və təhlükəsizlik məqsədlərinə görə Türkiyə Silahlı Qüvvələrinə xidmət edir. İdarənin inventarında hazırda 3 mini PUA komandası var. Bundan əlavə, qurumun inventarında xəritələşdirmə fəaliyyəti üçün 1 ədəd “Beech King Air B350 ER” (2019-cu ildə verilib) və 2 ədəd “Beech King Air B200” təyyarəsi var.