Türkiyə “Anka”/“Akıncı”, ABŞ “Skyborg”, Rusiya “Kub” PUA-ları ilə gündəmdədir

Müqavilə konkret olaraq “Anka” PUA-larının inkişafını təmin edəcək. Müqavilə çərçivəsində ölkələr “Anka”ya məxsus komponentləri birgə istehsal edəcək və inkişaf etdirəcək.

“Hər iki ölkənin qazancı üçün tarixi qardaşlığımızı davam etdirməyimiz çox vacibdir. Ötən illərdə həyata keçirilən insan resursları əməkdaşlığını bu müqavilədə də həyata keçirəcəyik”, - deyə TUSAŞ-ın rəhbəri Temel Kotil bildirib.

Türkiyənin “Baykar Savunma” şirkəti istehsal etdiyi “Akıncı” zərbə PUA-larını isə bu ay ölkənin Hərbi Hava Qüvvələrinə təhvil verəcək.

Şirkətin rəsmisi Selçuk PUA-nın ilk uçuşunu 2019-cu ilin dekabr ayında etdiyini bildirib.

“O vaxtdan bəri həm prototipləri, həm də təhvil verilmək üzrə olan kütləvi istehsal PUA-ları hazırladıq. Hazırda 9-cu PUA-nın istehsalı davam edir”, - deyə o qeyd edib.

“Akıncı”PUA-sı daha üstün texniki xüsusiyyətlərə malikdir. Yeni PUA-da Süni Zəkaya əsaslanan texnologiya tətbiq edilir. Onun köməyi ilə aparat avtomatik qalxma və enməni reallaşdırır, uçuş zamanı ətrafında baş verənləri təhlil edir və qiymətləndirir, obyekt, ağac, insan, maşın və s. tanınmasını həyata keçirir.

Digər məlumata görə, ABŞ Hərbi Hava Qüvvələri “Skyborg” layihəsi çərçivəsində PUA-ların inkişaf etdirilməsi üçün “Kratos” və “General Atomics” şirkətlərinə daha 20 milyon dollar vəsait ayırıb.

Vəsaitin 13,2 milyon dolları “Kratos” şirkətinin XQ-58A PUA-ları, 7 milyon dolları isə “General Atomics” şirkətinin MQ-20 “Avenger” PUA-ları üçün veriləcək.

Qeyd edək ki, “Skyborg” döyüş təyyarələrini müşayiət etmək üçün zərbə tipli Pilotsuz Uçuş Aparatının inkişafını nəzərdə tutan ABŞ Hərbi Hava Qüvvələrinin rəhbərlik etdiyi layihədir.

2020-ci ildə ABŞ ordusu layihədə iştirak etmələri üçün “Boeing”, “General Atomics”, “Kratos” və “Northrop Grumman” şirkətləri ilə müqavilələr imzalayıb. 29 sentyabr 2020-ci ildə ABŞ Hava Qüvvələri “Skyborg” prototipi üzərində işləmək üçün doqquz şirkətlə (AeroVirasion, Autonodyne LLC, BAE Systems, Blue Force Technologies, Fregata Systems LLC, Lockheed Martin, NextGen Aeronautic, Sierra Technical Services və Wichita State University) müqavilə bağlayıb. 21 dekabr 2020-ci ildə Kaliforniyanın Konkord şəhərində yerləşən “Voly Defence Solutions LLC” şirkəti də layihəyə əlavə edilib.

Rusiyanın “Kalaşnikov” konserninin bir hissəsi olan “ZALA Aero” şirkəti isə “Kub” kamikadze PUA-larının dəniz versiyasını hazırlayır.

Məlumata görə, PUA-lar sürətli katerlərdə, desant gəmilərində, xüsusi təyinatlı gəmilərdə istifadə edilə biləcək.

“ZALA Aero” PUA və mobil komplekslər istehsal edən Rusiyanın aparıcı istehsalçılarından biridir. 2015-ci ilin yanvar ayından etibarən şirkət “Kalaşnikov” şirkətlər qrupuna daxildir. Şirkətin əsas məhsulları PUA və aviasiya monitorinqi üçün proqram həlləridir.