Türkiyənin “Kargu” PUA-ları üçün ilk xarici müştəri tapılıb

Bu barədə Türkiyənin Müdafiə Sənayesi Komitəsinin rəhbəri İsmail Demir məlumat verib.

Türkiyənin təhlükəsizlik qüvvələrinin ehtiyacları istiqamətində inkişaf etdirilən və ilk dəfə IDEF-2017 sərgisində təqdim edilən “Kargu” 2018-ci ildə Türkiyə Silahlı Qüvvələri inventarına daxil olub. Döyüş meydanında baş verən dəyişikliklərə uyğun olaraq yenilənən və döyüş meydanında özünü sübut edən “Kargu” bir çox ölkənin diqqətini çəkib. Kvadrakopter tipli PUA ixrac bazarına çıxma üçün fərqli ölkələrdə keçirilən sınaqlarda iştirak edib.

Türkiyənin müdafiə sənayesi rəsmisi bildirib ki, yüksək səviyyəli danışıqlardan sonra “Kargu”nun ixracına dair ilk müqavilə imzalanıb. Sözügedən müqavilə çərçivəsində ixrac olunan hava vasitələrinin çatdırılması 2021-ci ildə başa çatacaq. Şirkət bu günə qədər Türkiyə təhlükəsizlik güclərinə çox sayda “Kargu” təslim edib.

PUA-ların konkret olaraq hansı ölkəyə tədarük edilməsi barədə məlumat verilməyib.

Hərbi qulluqçuların döyüş meydanına girməsindən əvvəl, xüsusilə riskli bölgələrdə təhdidlərin aşkarlanması və zərərsizləşdirilməsi üçün nəzərdə tutulan kvadrakopterlər tək bir hərbçi tərəfindən daşına bilər. Platforma dərin öyrənmə (Deep learning) alqoritmləri ilə sabit və ya hərəkətli hədəflərə qarşı təsirli şəkildə istifadə edilə bilər.

Gecə-gündüz səmərəli işləyə bilən sistem missiyanın ləğvi, evə qayıtmaq və özünü məhv etmək imkanları, yüksək performanslı naviqasiya və idarəetmə alqoritmləri ilə təchiz edilib.

PUA-ların əsas Taktiki-Texniki Xüsusiyyətləri aşağıdakılardır:

Mənzil: 5/10 km
Uçuş müddəti: 30 dəqiqə
Döyüş başlığı: 1,3 kq