Türkiyənin insansız sistemlər proqramında yeni mərhələ: Pilotsuz döyüş təyyarələri

Şirkətin texniki direktoru və PUA-ların ideya müəllifi olan Selçuk Bayraktar “Muharip İnsansız Uçak Sistemi” (MIUS) adlandırılan hava vasitəsi barədə açıqlamalar verib.

Layihənin 12 ildir planlaşdırıldığını bildirən Bayraktar qeyd edir ki, “Akıncı” zərbə PUA-larının kütləvi istehsala başlaması ilə bu barədə işlər daha da sürətləndirilib.

Hal hazırda dünyada bir çox şirkət bu sahədə inkişaf və araşdırmalar aparır. İnsansız döyüş təyyarələrinin PUA-lar kimi hava döyüşü konsepsiyasını dəyişdirəcəyi və gələcəkdə 5-ci nəsil döyüş təyyarələrini əvəz edəcəyi proqnozlaşdırılır.

MIUS səs sürətinə yaxın kreyser sürəti ilə hərəkət edə biləcək. Növbəti prototiplərin sürəti səs sürətindən çox olacaq. Təyyarənin 1,5 tona yaxın döyüş sursatı və faydalı yük tutumu olacağı bildirilir. Havadan havaya və quruya zərbələr endirmək üçün hava vasitələrinin müxtəlif ağıllı sursatlar və qanadlı raketlər daşıyacağı qeyd olunur. Pilotsuz döyüş təyyarələrinin radara görünməsi çox az olacaq.

Dünyada bu sahədə inkişaf etdirilən digər prototiplərdən fərqli olaraq MIUS-lar Türkiyənin “TCG Anadolu” sinifinə məxsus qısa uçuş-enmə zolağına malik hərbi gəmilərdən havaya qalxa və gəmiyə enə biləcək.

Selçuk Bayraktar təyyarələrin Süni Zəka ilə işləyən kompüterlərə malik olacağını, hədəflərə zərbə endirilməsi və yaxın döyüş manevrlərini avtonom şəkildə həyata keçirə biləcəyini qeyd edib. Süni Zəka sayəsində təyyarələr qarşılarına çıxan təyyarələrin dost və ya düşmənə aid olduğunu müəyyən edə biləcəklər.

Şirkət 2023-cü ildə təyyarələrinin ilk prototipini havaya qaldırmağı planlaşdırır.

Selçuk Bayraktarın verdiyi məlumatlara görə, MIUS-un Taktiki-Texniki Xüsusiyyətləri aşağıdakılardır:

Maksimum qalxma çəkisi:, 3,5+ ton
Yükdaşıma qabiliyyəti: 1,5 ton (gövdənin içində və qanadın altında sursat daşımaq qabiliyyəti)
Uçuş müddəti: 5 saat
Maksimum hündürlük: 12 kilometr
Sürəti: 900 km/s