Rusiya PUA-ları zərərsizləşdirə bilən kvadrokopterlər yaradır

“Volf-18” adlanan sistem mini PUA-ları ələ keçirmək və məhv etmək üçün hazırlanıb.

Bundan əvvəl, fevral ayında “Almaz-Antey” tamamilə avtomatik rejimdə düşmən PUA-ları aşkar edib vurmağı bacaran “Volf-18” kvadrokopterlərinin təkmilləşdirilmiş versiyasının sınaqlarının tamamlandığını elan edib.

Rusiya son zamanlarda mini PUA-lardan, xüsusilə partlayıcı maddələr quraşdırılaraq zərbə üçün göndərilən kvadrakopterlərdən narahatlığını dilə gətirir. Bu cür əldəqayırma PUA-lar Suriyadakı terrorçu və qiyamçılar da daxil olmaqla bir çox dövlət və qeyri-dövlət aktorları tərəfindən aktiv şəkildə istifadə edilir.

"Volf-18"in əsas versiyası ilk dəfə 2019-cu ildə "Armiya" hərbi-texniki forumunda nümayiş olunub.

Ölçüləri 60 x 60 sm və qalxma çəkisi 6 kq olan kvadrokopter işini avtomatlaşdırmağa imkan verən təkmilləşdirilmiş idarəetmə sistemi ilə yanaşı yeni optik qurğularla təchiz edilib. Kvadrokopter müstəqil şəkildə manevr edir, düşmən obyektlərini axtarır və seçir. Operator hədəfləri məhv etmək qərarını təsdiqləyir, "Volf-18" hədəfə yaxınlaşır və ona tor atır. Nəticədə, hücuma uğrayan PUA müvazinəti itirməyə başlayır və yerə çırpılır.

Hava vasitəsinin uçuş müddəti 30 dəqiqədir. Ona görə hərbçilər onu rəqib PUA-larının yerləşdirildiyinə əmin olduqları yerdə istifadə edirlər.