İsrailin antidron sistemlərini alan Cənubi Asiya ölkəsi hansıdır?

İsrail şirkətləri adətən müştərilərinin adlarını açıqlamır və müşahidəçilər bu sistemi Cənubi Asiyada kimin əldə etdiyi barədə fərziyyələr səsləndirirlər.

Cənubi Asiya ümumiyyətlə Əfqanıstan, Banqladeş, Butan, Hindistan, Nepal, Pakistan, Şri-Lanka və Maldivlərdən ibarətdir. İsrailin Əfqanıstan, Banqladeş və Pakistanla diplomatik əlaqələri yoxdur və Maldiv adaları ilə münasibətlərini yeni qurmağa başlayıb.

IAI daha əvvəl Hindistanla əməkdaşlıq edib. 2017-ci ildə şirkət 2 milyard dollar dəyərində müqavilə imzalayıb. “The Times of India” xəbər verir ki, 2020-ci ildə Hindistandakı “DefExpo” konfransında “Drone Guard” sisteminin alınması barədə müzakirələr gedib.

Hindistanın “ThePrint” adlı yerli media platforması iyulun 9-da Hindistan Ordusunun “rabitə və naviqasiya siqnallarını aşkarlayacaq və pozacaq antidron sistemlərinin” alınması barədə xəbərlər yayıb. Məqalədə sistem təmin edən şirkət və ya şirkətlər barədə məlumatlar verilmir.

“Drone Guard” müqaviləsini elan etmədən bir neçə gün əvvəl IAI şirkəti Şri-Lanka Hərbi Hava Qüvvələrinə aid təyyarələrin modernləşdirilməsi ilə bağlı müqavilə imzaladığını bildirib. Şri-Lanka mediası və müdafiə səlahiyyətliləri də son illərdə artan dron təhdidlərindən narahat olduqlarını dilə gətiriblər.