Çin Qarabağ müharibəsindən növbəti dərslər götürür: 60-cı illərdə istehsal edilən qırıcı pilotsuzlaşdırıldı

Çinin “South China Morning Post” nəşri yazır ki, Tayvan adası ətrafındakı hərbi təlimlər zamanı Çin ordusu 1960-cı illərdə istehsal edilən J-7 qırıcılarını havaya qaldırıb.

Hərbi ekspertlər qeyd edir ki, uzun müddətdir istifadə olunmayan təyyarələr Çin ordusu tərəfindən pilotsuzlaşdırılıb. Çin ordusu onlardan Tayvanın Hava Hücumundan Müdafiə sistemlərini sınamaq üçün istifadə etmək niyyətindədir.

Sınaqlar eyni zamanda bütün döyüş təyyarələrinin yenidən istifadə edilə biləcəyini yoxlamaq üçün də keçirilə bilər. Manevrlərdə ümumilikdə 4 ədəd J-7 təyyarəsi istifadə edilib. Bu təyyarələr 60-cı illərdə SSRİ-də istehsal edilən MiQ-21 qırıcılarının modifikasiya edilmiş versiyasıdır.

Təlimlər zamanı iki J-16 çoxfunksiyalı döyüş təyyarəsi və Y-8 radioelektron döyüş təyyarəsi daxil olmaqla daha müasir təyyarələr də Tayvanın HHM zonasına daxil olublar.

Nəşr yazır ki, Çin yalnız J-7-ləri deyil, minlərlə ikinci nəsil qırıcını pilotsuzlaşdırıb.

Sinqapurdakı “Rakaratnam” Beynəlxalq Araşdırmalar Məktəbinin hava qüvvələri analitiki Ben Ho Çinin Azərbaycan Ordusunun keçən payızda Qarabağda istifadə etdiyi taktikaları öyrəndiyini deyir. Azərbaycan bu müharibədə Ermənistanın HHM sistemlərinin yerini aşkarlamaq üçün SSRİ-də istehsal edilən An-2 təyyarələrindən istifadə edib. Pilotsuzlaşdırılan təyyarələr Ermənistan tərəfindən hədəf olaraq təyin edilib və onları vurmaq üçün HHM sistemləri aktivləşdirilib, beləliklə sistemlərin yeri aşkarlanıb. Daha sonra Azərbaycan Türkiyə və İsrail istehsalı PUA-larla Ermənistana məxsus HHM sistemlərini məhv edib.