ABŞ donanması insansız gəmilərinin sayını artırmağa çalışır

Proqram çərçivəsində hazırda ABŞ donanması üçün hazırlanan “USV Ranger” və “USV Nomad” adlı iki insansız gəmi var. ABŞ donanmasının rəsmisi daha iki gəminin inkişaf mərhələsində olduğunu bildirib. Proqramın əsas məqsədi insan müdaxiləsi olmadan işləyə bilən və uzun müddət baxım tələb etməyən böyük və orta ölçülü platforma yaratmaqdır.

Gəmilərin böyük ölçüdə olacağı bildirilir. 1000-2000 ton subasımına malik gəmilər ənənəvi patrul katerlərindən və bəzi freqatlardan daha böyük olacaq.

İstehsalı başa çatan iki gəminin neft və qaz sənayesi üçün inşa edilmiş dəstək gəmilərinə əsaslandığı və quruda yerləşən idarəetmə stansiyasından idarə olunduğu bildirilir.

Layihə çərçivəsində inşa edilən “Nomad” adlı avtonom dəniz platforması bundan əvvəl 8 min kilometrdən çox yol qət edib. Platforma Meksika Körfəzindən Panama Kanalı ilə Birləşmiş Ştatların qərb sahilinə qədər hərəkət edib. Panama kanalının bir hissəsində dəniz platforması bir nəfər tərəfindən idarə olunub. Qalan hissələrdə avtonom fəaliyyət göstərib.