Dünyanın doqquzuncu ən böyük silah ixracatçısı| Cənubi Koreyanın qlobal silah bazarında rolu artır

Cənubi Koreyanın Müdafiə Texnologiyalarının Təşviqi Tədqiqat İnstitutu (Kukkiyeon) tərəfindən nəşr olunan “2021 Dünya Müdafiə Bazarı” adlı hesabatda qeyd olunub ki, ölkənin 2016-2020-ci illər arasındakı beş illik dövrdə müdafiə ixracı 2011-2015-ci illər arasındakı beş illik dövrlə müqayisədə (0,9%) 210% artaraq rekord səviyyəyə çatıb.

Bu dövrdə Cənubi Koreyanın dünya müdafiə bazarındakı payı 2,7%-ə yüksəlib. 2005-ci ilin göstəricisi ilə müqayisədə payda 649% artım var.

Cənubi Koreyanın 2015-2019-cu illər arasında tutduğu mövqe 10-cu olub. Dünyanın ən böyük silah ixracatçıları müvafiq olaraq ABŞ, Rusiya, Fransa, Almaniya, Çin və Böyük Britaniyadır.

Koreyanın ən çox silah satdığı üç ölkə bunlardır: Böyük Britaniya (14%), Filippin (12%) və Tailand (11%). Region olaraq Asiya-Sakit Okean regionu ixracın 55%-ni tutaraq liderdir.

“Koreya müdafiə sənayesi mövcud əsas ixracatçı ölkələrlə müqayisə oluna bilən qabaqcıl silah sistemləri istehsal edə bilmək üçün böyüyüb. Koreyanın müdafiə sənayesində sifarişlərin qazanılması kimi ixraca yaşıl işıq yandırılıb. Koreya bu yaxınlarda bir-birinin ardınca yerli silah sistemlərinin geniş miqyaslı ixracını elan edib”, - deyə hesabatda qeyd olunur.

Cənubi Koreya həm də böyük miqdarda silah idxal edən ölkədir. Məlumata görə, Cənubi Koreya dünyanın yeddinci ən böyük silah idxalçısıdır.

Kukkiyeon hesabatına görə, uzunmüddətli perspektivdə Cənubi Koreyanın idxal etdiyi silah sistemlərinin nisbəti yerli istehsalın təsiri ilə azalacaq.

Cənubi Koreyanın ixrac etdiyi əsas silah sistemləri satışları arasında Filippin və Tailanda freqatlar və FA-50 yüngül hücum təyyarələrinin satışı diqqəti çəkir.

Ölkənin müdafiə xərcləri 2011-ci ildən etibarən 40% artıb. Bu, qlobal müdafiə xərclərinin 2,3%-nə uyğundur. 2020-ci ilə qədər Cənubi Koreya Çindən (76%) sonra dünyada müdafiə büdcəsini ən çox artıran ikinci ölkə olub.

Cənubi Koreyanın Müdafiə Nazirliyi 2022-ci maliyyə ili üçün 47,7 milyard dollarlıq büdcə tələb etmişdi. Şərqi Asiya ölkəsinin müdafiə büdcəsi digər qonşuları kimi daim artır. 2005-ci ildə cəmi 17,9 milyard dollar olan müdafiə büdcəsi 2011-ci ildə 27 milyard dollara, 2017-ci ildə isə 34 milyard dollara yüksəlib.