BMT Təhlükəsizlik Şurasının kibertəhlükəsizlik üzrə iclası keçiriləcək

Məlumata əsasən, onlayn iclas Estoniyanın baş naziri Kaya Kallasın sədrliyi ilə keçiriləcək, təşkilatın baş katibinin müavini İdzumi Nakamitsu hesabat təqdim edəcək.

Bildirilir ki, kibertəhlükəsizlik mövzusu BMT Təhlükəsizlik Şurasının üzvü kimi Estoniyanın prioritetlərindən biridir.

Estoniya rəmiləri bildirir ki, beynəlxalq təhlükəsizliyi təmin etmək üçün kiber məkandan gələn təhlükələr də daxil olmaqla, mövcud olan bütün təhdidlər nəzərə alınmalıdır.

Təhlükəsizlik Şurasında keçiriləcək iclasın məqsədi mövcud beynəlxalq hüququn və məsuliyyətli dövlət davranışı normalarının kiber məkanda da tətbiq olunduğunu təsdiqləməkdir. Qeyd olunur ki, Birləşmiş Millətlər Təşkilatı Estoniyanın qurulmasına kömək etdiyi qlobal kiber sabitlik çərçivəsini qəbul edir.

Qeyd edək ki, Estoniya hökuməti xüsusilə koronavirus dövründə bir çox kritik təşkilatlara kiber hücumlar edildiyini bildirib. Rəsmilər hücumların Rusiya tərəfindən həyata keçirildiyini qeyd edir.