ABŞ Xüsusi Əməliyyatlar Komandanlığı SZ ilə döyüş gücünü artırır

Ötən ilin mart ayında baş tutan Yale Xüsusi Əməliyyatlar Konfransı zamanı ABŞ xüsusi əməliyyat rəhbərləri SOCOM-un SZ-yə necə yaxınlaşdığına dair bəzi fikirlər təklif etdilər. SOCOM-un baş texnologiya direktoru Snehal Antani daha yaxşı və daha sürətli bir araşdırma, inkişaf və tətbiq prosesini təmin etmək üçün alimlərin və texniki mütəxəssislərin döyüşçülərə mümkün qədər yaxın olmasını istədiklərini söyləyib.

SOCOM SZ üçün yeni deyil. 2019-cu ildə SOCOM-un Dəniz komponenti olan Dəniz Piyadaları Xüsusi Əməliyyatlar Komandanlığı (MARSOC), seçim prosesini təkmilləşdirmək və daha çox namizədin operator olmasını təmin etmək üçün SZ ilə təcrübə aparmağa başladı.

Birgə SZ Mərkəzinin (JAIC) direktoru leytenant Mike Groen bunun təkcə texnologiya deyil, funksiya olduğunu bildirib: “Həqiqətən insanlardan “Yaxşı, bu qərarı necə verirsiniz?” deyə soruşmağa başlayanda bu, çox öyrədici hal alır. Hansı datadan istifadə edirsiniz? Hansı datadan istifadə etməlisiniz ? Bu məlumatlar sizə necə təqdim olunur? Onu başqa cür təqdim etmək olarmı? Bu məlumat əslində kimə məxsusdur? Bu tip təşkilatlara kənardan kimisə cəlb etmək böyük bir sıçrayışdır. Beləliklə, birinci addım olaraq ağzınızı yumun və öyrənin, dinləyin, komandanın bir hissəsi olmaq hüququ qazanın”.

SOCOM həmçinin xüsusi operatorlara döyüş meydanında üstünlük təklif edən çoxsensorlu məlumatların sintezi və emalı texnologiyasını inkişaf etdirməyə çalışır. Daha dəqiq desək, SOCOM temperatur, hündürlük, görünürlük, rütubət, yerüstü təsvirlər kimi müxtəlif məlumatları tez bir zamanda birləşdirmək yollarını inkişaf etdirmək, döyüş sahəsinin dəqiq təsvirini yaratmaq və komandolara təqdim etmək üçün sənaye ilə əməkdaşlıq edir.