ABŞ Süni Zəka sahəsində Çinlə rəqabətə girir

Hal-hazırda ekspertlər SZ-nin “üçüncü dalğası”nın baş verdiyini düşünür və burada SZ silah və texnikalara inteqrasiya edilir və öldürcü maşınların düşünməsinə və qərar verməsinə kömək edir.

DARPA gələcək döyüş sahələrində maşınların alət olmaqdan daha çox həmkar kimi çalışacağını bildirib.

ABŞ-ın müdafiə naziri Lloyd Oustin dünən Süni Zəka üzrə Milli Təhlükəsizlik Komissiyası tərəfindən təşkil edilən beynəlxalq konfransda çıxış edərək bildirib ki, hazırda SZ sahəsində sürətlə inkişaf edən ölkə yalnız ABŞ deyil.

“Çin liderləri 2030-cu ilədək SZ sahəsində dünya səviyyəsində dominant olmaq niyyətində olduqlarını açıqlayıblar”, - deyə o qeyd edib.

Oustin Çin ilə SZ silah yarışında qalib gəlmək üçün ABŞ-ın önümüzdəki beş il ərzində SZ araşdırması və inkişafına təxminən 1,5 milyard dollar xərcləyəcəyini bildirib.

“Pekin onsuz da nəzarətdən kiberhücumlara, avtonom silahlara qədər bir sıra vəzifələr üçün SZ-dən istifadə edir. Qazanmaq üçün yarışacağıq, amma bunu düzgün bir şəkildə edəcəyik”, - deyə Pentaqon rəhbəri bildirib.

Qeyd edək ki, Çin 2030-cu ilədək SZ sahəsində qlobal lider olmaq niyyətindədir

2017-ci ilin iyun ayında Çin Dövlət Şurası Pekinin Yeni Nəsil Süni Zəka İnkişaf Proqramını yayımlayıb. Sənəd ölkənin strateji hədəflərini müəyyənləşdirir, onlara çatma müddətlərini təyin edir və işin bürokratik mexanizmlərini və maliyyə mənbələrini təsvir edir.

Çinin Yeni Nəsil Süni Zəka İnkişaf Proqramı ölkə üçün üç strateji hədəf qoyur. Birincisi, 2020-ci ilədək Çinin SZ inkişafı inkişaf etmiş ölkələrdə analoji sahələrlə bərabər olmalı idi. Eyni zamanda, SZ sənayesinə ayrılan xərclər 22,5 milyard dollar, SZ ilə əlaqəli sahələrin inkişafına 150 milyard dollardan çox olmalıdır. İkinci hədəf ondan ibarətdir ki, 2025-ci ilədək SZ-nin bəzi spesifik sahələrində lider mövqelərə nail olmaq lazımdır, burada investisiyalar təməl sahədə 60 milyard dollar, əlaqəli sahələrdə 720 milyard dollar olmalı idi.

Nəhayət, 2030-cu ilədək Çin SZ sahəsində əsas qlobal yenilik mərkəzi olacaq və bu vaxta qədər fundamental sənayedə investisiyalar 150 milyard dollar, əlaqəli sahələrdə isə 1,5 trilyon dollar təşkil edəcək.